Во Тетово поставени четири семафори со звучна сигнализација за слепите и слабовидите лица
Четири крстосници во Тетово добија семафори со звучна сигнализација во пресрет на Меѓународниот ден на белиот стап; барање е системот да се прошири на сите семафори.
По повод Меѓународниот ден на белиот стап, во Тетово во употреба беа пуштени четири семафори кои се опремени со звучна сигнализација за да се зголеми безбедноста на слепите и слабовидите лица при преминување на коловозите.
Новите уреди се поставени на четири крстосници и треба да им помогнат на лицата со оштетен вид побезбедно да ги преминуваат улиците. Градските служби велат дека тоа е одговор на долготрајните барања од здруженијата кои ги застапуваат лицата со попреченост.
Претходна состојба
Во Тетово и порано постоеја семафори со звучна сигнализација, но многу од нив излегоа од функција поради недоволно одржување. Дел од семафорите беа и отстранети при изградбата на кружни текови на повеќе сообраќајници.
„Едно од нашите барања беше на крстосниците каде што сообраќајот се регулира со семафори, тие да бидат опремени со звучна сигнализација. Сега нашето барање се реализира и во голема мера ќе се олесни преминувањето на крстосниците за слепите и слабовидите лица. Засега вакви семафори има на четири крстосници, но наше залагање е звучна сигнализација да се постави на сите семафори во градот“, вели Хамди Џамаили, претседател на Здружението на слепи и слабовидни лица од Тетово.
Од здружението најавија дека ќе продолжат да инсистираат на редовно одржување на уредите и на проширување на системот, така што звучната сигнализација ќе биде опфатена на повеќе точки низ градот.
Фото: СДК.МК)
