ВРЕДИ и ДУИ во судир поради случајот на Артан Груби

Случајот со поранешниот вицепремиер Артан Груби предизвика јавно спротиставување меѓу партиите од албанскиот политички блок откако ВРЕДИ побара Обвинителството јавно да соопшти зошто се уште нема поднесено обвинение, со оглед на тоа што шестмесечниот рок за куќен притвор завршува на 22 август.

Јавни прашања и правни опции

ВРЕДИ во својата реакција бараше јасност од Обвинителството за текот на постапката во предметот наречен „Лотарија“ и предупреди дека ако до 22 август не биде поднесено обвинение, куќниот притвор ќе биде укинат, со што ќе стане прашање какви понатамошни мерки ќе се преземат.

„ВЛЕН бара од Обвинителството да престане да игра криенка со правдата и јавно да каже зошто sè уште нема обвинение во случајот 'Лотарија', каде заглавија постапките и дали воопшто презело нешто по наодите на американските власти .Во меѓувреме, прав фаќа и прашањето за наводите поради кои Груби заврши на американската црна листа, а јавноста со право прашува дали Обвинителството воопшто постапува. Нашиот стратешки партнер, Соединетите Американски Држави, го стави Груби на црната листа поради корупција од високо ниво",

ДУИ возврати дека ваквите јавни прозивки претставуваат политички притисок врз правосудните институции и дека обвинителите и судовите треба да одлучуваат исклучиво врз основа на законот и доказите, а не според барања на политички партии.

- Обвинителството и судовите мора да одлучуваат врз основа на докази, а не врз основа на политички и партиски директиви. Селективна партиска правда не им е потребна ниту на граѓаните ниту на Северна Македонија."

Од Обвинителството порачаа дека постапката е во тек и дека надлежен обвинител ќе донесе одлука согласно пропишаните законски правила и норми, при што ќе бидат запазени сите рокови. Правните експерти велат дека рокот до 22 август се однесува само на мерката куќен притвор, но дека можат да се определат и други обезбедувачки мерки кои ќе ѝ дозволат на постапката да продолжи.

Од Основниот кривичен суд Скопје објаснија дека доколку нема обвинение, куќниот притвор се укинува и судот по службена должност ќе определи мерка за обезбедување присуство — на пример одземање патна исправа — и дека притвор може повторно да се одреди ако обвинителот го побара тоа и судот го прифати.

Груби е осомничен за проневера од 8,2 милиони евра од Државната лотарија. По неколку часа во притвор, тој рече дека не се чувствувал безбеден во Шутка, па обвинителот, оперативци од Агенцијата за национална безбедност (АНБ), од Министерството за внатрешни работи (МВР) и судијата на претходна постапка веднаш го извадија од затворот и предложија мерка куќен притвор.

На 24 ноември 2025, тогашниот државен обвинител Љупчо Коцевски изјави дека доказите против Груби се собрани и дека се чека само негова екстрадиција од Косово. Во случајот како осомничен се наведува и Прпарим Бајрами, претседател на Управниот одбор и генерален директор на Државна лотарија, кој сè уште е во бегство. Артан Груби се предаде на граничниот премин Блаце на 23 февруари 2026, откако претходно беше во Косово, каде премините во голем дел се прават само со лична карта.

Фото: прес-материјал од настанот