За малку несреќа кај Шкрљево — товарен воз поминал на црвено, машиновозачот отстранет од работа

Товарен воз во Хрватска денес попладне помина на црвено светло близу Шкрљево, по што вработените на железницата го исклучија напонот и со тоа спречија судир со патничкиот воз, соопшти ХЖ Карго.

Инцидентот се случил во 13:06 часот помеѓу станиците Шкрљево и Меја, кога товарниот воз на ХЖ Карго поминал семафор што покажувал црвено и не застанал за предвиденото вкрстување со патнички воз што доаѓал од Загреб. Во патничкиот воз број 4000, кој патувал од Загреб кон Риека, имало околу 45 патници.

Железницата го стопираше сообраќајот, патниците однесени со автобус

Вработените во ХЖ Инфраструктура навреме го регистрирале прекршувањето на безбедносните правила и, постапувајќи според утврдените процедури, ја исклучиле струјата во контактната мрежа. Благодарение на тоа, двата воза застанале на безбедно растојание, а патниците биле згрижени и превезени со автобус до Риека.

Железничката врска беше привремено затворена додека се завршуваа потребните проверки; линијата целосно беше отворена за сообраќај во 17:35 часот.

Машиновозачот на товарниот воз веднаш е отстранет од работа додека трае истрагата за сите околности што довеле до овој сериозен безбедносен пропуст.

Од ХЖ Карго појаснија: "Уште еднаш им се заблагодаруваме на вработените во ХЖ Инфраструктура кои реагираа брзо и правилно." Компанијата додаде и дека: "Нашите машиновозачи се континуирано обучени и образовани со посебен акцент на безбедноста. Проверките се редовни и пропишани, но очигледно не се доволни. И покрај фактот дека истрагата за двата инциденти е сè уште во тек, Управата веќе вчера започна вонредна постапка за зголемена проверка на терен и преиспитување на самиот модел на надзор и контрола. Безбедноста на сите учесници во сообраќајот е апсолутен приоритет и ние ќе инсистираме на тоа во секоја понатамошна работа и акција".

Овој настан се случи само еден ден по сериозниот судир меѓу товарен и патнички воз во близина на Крижевци, при што во судирот што се случи вчера околу 10:00 часот на пругата Свети Иван Жабно – Градец беа повредени вкупно 25 лица.

Фото: Слободен печат / Драган Митрески