Законот за „Скопје 2028“ повлечен од Собранието на мое барање, вели премиерот

Премиерот Христијан Мицкоски соопшти дека предлог-законот за „Скопје – европска престолнина на културата 2028“ е повлечен од Собранието на негово инсистирање и ќе биде ставен на јавна расправа за да не остане никакво сомнение во врска со транспарентноста на процесот.

Според него, законската рамка предвидува формирање на Фондација која, почнувајќи од оваа година, ќе ги води подготовките за остварување на титулата, со конкретни настани предвидени за 2027 и 2028 година и трансформација во јавно претпријатие во 2029 година.

Фондација прво, јавно претпријатие потоа

Во обраќањето за време на денешната посета на Клиничката болница во Битола, Мицкоски го опиша проектот како инициран пред десет години, но до сега неподготвен за реализација. Тој нагласи дека владата влегла во процес во кој јасно ги дефинирала приоритетите и дека законот е изготвен според препораките и практиката на Европската Унија.

„Јас ја разбирам реакцијата на јавноста поради тоа што има жесток обид за нејзина дезинформација. Прво, станува збор за Фондација 'Скопје – европска престолнина на културата‘ и тоа е проект кој е започнат уште пред 10 години. За жал, ништо досега не е направено. Владата дојде во ситуација да се соочи со предизвик, а тоа е првпат на некој град да му биде одземена таа титула – европска престолнина на културата“, рече тој.

Мицкоски појасни дека не се работи за избор на директор во оваа фаза, туку за фондација која ќе работи на реализација на проектот. Тој напомена дека постои таканаречена книга или 'bidbook' која е прибавена пред пет-шест години и ги содржи приоритетите кои Владата и актуелниот градоначалник ги наследиле.

Според претставениот план, во 2027 година ќе има 50 дена со настани, во 2028 година настаните ќе се одвиваат секој ден, а во 2029 година фондацијата треба да прерасне во јавно претпријатие со директор. „Тоа е суштината на проектот. За жал, некој се обидува свесно да ја манипулира јавноста и свесно да ги дезинформира граѓаните. Но, нема да дозволам да остане каков било сомнеж во кој било процес. Затоа, на мое инсистирање, законот беше повлечен од парламентот. Тој ќе биде ставен на јавна дебата“, рече Мицкоски.

Тој призна дека повлекувањето може да предизвика мало задоцнување на подготовките, но порача дека до крајот на годината владата ќе се обиде да ги испорача сите потребни активности за Скопје да добие статусот европска престолнина на културата во 2028 година.

Фото: Влада