Засилен сообраќај на патиштата, најмногу се чека на „Богородица“
Најголеми застои се на „Богородица“; АМСМ предупредува на ризик од одрони на планинските правци
Зголемен интензитет на сообраќај е регистриран низ државата, особено на патиштата надвор од населбите и на граничните премини, информира Автомото сојузот на Македонија.
При излез од земјата на ГП „Табановце“ се бележи застој од околу 30 минути, додека најголемо време на чекање има на ГП „Богородица“, каде што возачите и патниците во моментов се задржуваат околу еден час. На другите гранични премини засега нема подолги задржувања при влез или излез.
Услови на патиштата и препораки
На државната патна мрежа сообраќајот се одвива без поголеми проблеми, при што коловозите се суви и проодни. Сепак, АМСМ апелира возачите да ја прилагодат брзината според условите на патот и да ги почитуваат поставените сообраќајни знаци.
Посебно внимание треба да се посвети при движење низ котлини, речни долини и клисури, каде постои ризик од одрони и пад на камења.
АМСМ посочува дека зголемена внимателност е препорачлива на патните правци Катланово–Велес, Маврово–Дебар–Струга, Виница–Берово и Кочани–Делчево.
Сојузот ги повикува сите учесници во сообраќајот да возат внимателно и да ги почитуваат ограничувањата, особено поради зголемениот сообраќаен интензитет.
Фото: Принтскрин / ЈП