Заврши четиридневната конференција „Европски дијалози“ за зајакнување на дијалогот меѓу младите во Западен Балкан

Со јавна дискусија и конкретни предлози во рамки на пет тематски целини заврши четиридневната меѓународна конференција „Европски дијалози“, која се одржа како дел од програмата „Споделени хоризонти“. Целта на програмата е да го зајакне дијалогот меѓу младите во Западен Балкан во контекст на проширувањето на Европската Унија.

Пет теми и предлози

Конференцијата ги опфати следниве тематски целини: европски вредности, социјална Европа, еколошка Европа, економска Европа и културна Европа. Во рамки на секоја целина учесниците изнесоа предлози и иницијативи за тоа како да се приближат европските политики и практики до младите надвор од формалните институции.

„Мислам дека е многу важно ова издание да се одржи на Балканот, регион којшто се наоѓа на клучен крстопат во историјата на Европа и на место за кое што ние Французите се обидуваме повторно да се инвестираме со значителни средства пред неколку години“, изјави Кристоф ле Риголе, амбасадор на Франција во Македонија.

Моника Зајкова, пратеничка и претседателка на Либерално-демократската партија, нагласи дека е потребно да се создаде простор кој им дава на младите конкретни можности сега, а не само да се подготвуваат за иднината. „Мислам дека најсилниот европски проект или дијалог кој што можеме да го водиме е да создадеме простор во којшто ќе им дадеме уверување на генерациите дека ниту една граница не им ги одредува границите на нивните можности, на нивните иновации, на можноста за работа и претприемништво. И еве една порака за крај време е да престанеме да ги подготвуваме младите само за европската иднина или да зборуваме за европските вредности и наследства, туку да почнеме да им даваме европска сегашност“, изјава Моника Зајкова, пратеничка и претседателка на Либерално-демократската партија.

„Не смееме да бидеме апатични. Ако работите слабо или бавно се движат најлесно е да кажете ќе застанам и јас. Не можете да кажете институциите да се променат доколу и вие не се промените. Општеството мора да отвори простор за младите луѓе да партиципираат“, рече Андра Ибрахими.

Организаторите истакнаа дека програмата има за цел да создаде трајни канали за размена и граѓанско учество на младите преку границите. Конференцијата заврши со серија препораки наменети за младински организации, мрежи на граѓанското општество и регионални партнери за натамошна работа на предложените проекти.

Фото: прес-материјал од настанот