Kostot e rritura dhe thatësirat po ulin prodhimin bujqësor

Ajo që më parë dukej rast i veçantë, po bëhet gjithnjë e më shpesh pjesë e sezonit bujqësor: periudha me mungesë uji, temperatura të larta dhe ndryshime të papritura të motit ndikojnë direkt në rritjen dhe cilësinë e kulturave. Për prodhuesit, kjo do të thotë shpenzime më të mëdha, por jo domosdoshmërisht rendimente më të larta.

“Përveç faktit që vetë prodhuesi bujqësor ka problem me plasimin e produkteve të tij, unë shumë herë e kam thënë më parë, që problemi më i madh në prodhimin e tij është pikërisht faktorët klimatikë sepse jemi dëshmitarë që kemi gjithnjë e më pak sasi uji që kultura i duhet gjatë gjithë prodhimit, por njëkohësisht do të përballemi edhe me temperatura mjaft të larta, të cilat do të ndikojnë në mënyrë të dëmshme në vetë prodhimin kështu që ai duhet të kërkojë mënyra se si dhe çfarë më tej,” thotë Risto Velkov, agronom dhe bujk.

Më shumë shpenzime, korrje më të vogla ose me cilësi më të dobët

Pjesë e korrjes humbet, pjesa tjetër del me cilësi më të dobët, dhe shpenzimet për vaditje dhe mbrojtje rriten. Kjo rrit presionin mbi fitimet dhe vë në dyshim qëndrueshmërinë e praktikave aktuale prodhuese.

Bujqit po përgjigjen me ndryshime teknike dhe agronomike: rrjeta mbrojtëse, sisteme më efikase të vaditjes, ndryshim i varieteteve dhe zgjedhje kulture që duron më mirë kushtet e reja. “Ai duhet të adaptohet ndaj asaj që kërkojnë vetë faktorët klimatikë. Pra, vetë prodhuesi duhet të adaptohet në atë mënyrë të prodhimit,” thotë Risto Velkov, agronom dhe bujk.

Organizatave mjedisore u bëjnë thirrje gjithashtu që të lidhet energjia me ndryshimet klimatike. “Djegia e karburanteve fosile, veçanërisht qymyrit dhe gazit fosil, është një burim i rëndësishëm i emetimeve që nxisin ndryshimet klimatike. Prandaj, tranzicioni drejt energjisë së pastër është i rëndësishëm për të ardhmen e bujqësisë dhe komuniteteve lokale. Tranzicioni i drejtë nënkupton lënien graduale të qymyrit, shmangien e një varësie të re nga gazi fosil dhe investime në burime të ripërtëritshme, vende të reja pune dhe mbështetje për njerëzit dhe rajonet e prekur nga tranzicioni. Me planifikim të duhur dhe në kohë, mund të ulim rrezikun klimatik dhe njëkohësisht të krijojmë ekonomi lokale më rezistente,” thotë Eko Svest.

Bujqit po përshtaten sezon pas sezoni, por fushat nuk mund të kompensojnë pafundësisht pasojat e thatësirave, valëve të nxehtësisë dhe motit të paqëndrueshëm. Sa shpejt do të përshtaten bujqësia, sektori i energjisë dhe politikat shtetërore do të ndikojë te çmimet e ushqimit dhe nëse prodhuesit do të mund të prodhojnë ende në kushte gjithnjë e më pak të parashikueshme.

Shkruar nga: Suzana Miceva

Foto: material shtypi nga ngjarja