Жител пали гуми и предизвика пожар во борова шума кај Бигла

Пожар избувна во борова шума во близина на делчевското село Бигла откако жител, кој палеел гуми во својот двор, изгубил контрола над огнот, изјави во видеообраќање директорот на Дирекцијата за заштита и спасување.

„Неодговорно лице палело гуми во својот двор во селото Бигла, кое е село од разбиен тип, односно куќите се распоредени на неколку ридови. При тоа, лицето изгубило контрола врз огнот, по што пожарот се проширил во блиската шума. Во моментов во Бигла има голем шумски пожар во борова шума. Од страна на градоначалникот веднаш се ангажирани сите расположливи сили од Делчево. На терен се излезени пожарникари, а побарана е помош и од соседните противпожарни единици. Во моментов кон местото на пожарот се упатуваат и три 'ертрактори' од Дирекцијата за заштита и спасување, а веќе е ангажиран и хеликоптер на полицијата“, рече Ангелов во видеото.

Според Ангелов, по пријавата веднаш биле повикани сите расположливи сили од Делчево, а побарана е и дополнителна помош од противпожарни единици од околните градови. Тој исто така потврди дека се упатиле и трите противпожарни авиони на ДЗС кон местото на настанот.

Општината ангажирала тешка механизација — трактори и булдожери — кои работат на правење противпожарни пресеци меѓу огнот и селото со цел да се заштитат куќите и да се сопре ширењето на пожарот.

Лицето кое го предизвикало пожарот, заедно со еден пожарникар и припадник на ангажираните општински служби, вдишале поголема количина чад додека се обидувале да го локализираат огнот, поради што превентивно се пренесени на лекарски преглед.

Ангелов кажа дека се прават максимални напори за ставање на пожарот под контрола и најави дека ќе достави дополнителни информации како што ситуацијата се буде менувала.

Фото: прес-материјал од настанот