Жители на Шупли Камен бараат поништување на дозволата за вадење песок во Пчиња

Жителите на кумановското село Шупли Камен денеска одржаа протест со барање да се поништи дозволата за вадење песок во реката Пчиња.

Според нивните тврдења, приватна фирма почнала со експлоатација на песокот пред десетина дена и веќе уништила дел од речното корито, а ако продолжи ќе ја загрози доставата на вода за пиење во селото.

Бараат инспекција и повлекување на дозволата

Протестот го адресираше АД Водостопанство и Министерството за животна средина, кои според жителите издале дозвола за фирмата. Жителите велат дека вадењето го поткопало коритото, има високи брегови и дека дрвјата покрај реката испукале и исушиле.

„Ако исцрпат уште еден метар под нивото на речното корити, водата ќе се повлече од бунарите и од базенот на селскиот водовод. Тоа ќе биде голема катастрофа, ќе немаме ни вода за пиење како што останавме и без наводнување. Ако продолжи експлоатцијата целосно ќе нè уништат. Видете што направија за десетина дена, ршум. Коритото е поткопано со високи брегови, сите дрвја се исушија. Во проектот стои уредување на речното коритото, ако ова е уредување, нека дојдат да видат надлежните што направија“, вели Гоце Станковски, претседател на Месната заедница Шупли Камен.

Жителите побараа итна теренска инспекција и поништување на дозволата за експлоатација. Тие велат дека веќе се гледа оштетување на коритото и бреговите и дека тоа директно ја загрозува водоснабдувањето од бунарите и селскиот базен за пиење вода.

Исто така предупредија дека евентуалната продолжена експлоатација ќе има долгорочни последици по наводнувањето и земјоделието во селото и побараа објавување на дозволата и мерките за заштита на животната средина од компанијата.

Фото: СДК.МК)