Андоновски најави Национален дата‑центар што ќе ја консолидира државната ИТ инфраструктура

Министерот за дигитална трансформација Стефан Андоновски најави изградба на Национален дата‑центар со цел да се консолидира расцепканата државна ИТ‑инфраструктура, да се подигне нивото на заштита на податоците и да се создаде основа за развој на нови дигитални услуги.

Во гостување во емисијата „Тема на денот“, Андоновски посочи дека државните информациони системи и опрема денес се распоредени во повеќе од дваесет помали дата‑центри и серверски локации, што создава дополнителни трошоци за опрема, електрична енергија, ладење, непрекинато напојување, одржување и безбедност.

Зошто е потребно консолидирање

„Не можете да градите дигитална држава, а истовремено да се грижите за десетици серверски простории и опрема распоредени низ целата држава. Пластично кажано, тоа е како да управувате со 20 мали ниви расцепкани од Охрид до Куманово и од Скопје до Струмица – на секоја локација ви требаат опрема, луѓе, логистика и безбедност. Националниот дата‑центар ќе ни овозможи сето тоа да го консолидираме и да воспоставиме единствени стандарди“, изјави Андоновски.

Според министерот, проектот треба да ја поддржи следната фаза од дигиталната трансформација: растот на електронските услуги, интероперабилноста меѓу институциите, државниот облак, дигиталниот идентитет и примената на нови технологии.

Првата фаза од проектот е проценета на околу 20 милиони евра, а средствата ќе се обезбедат преку Планот за раст и Реформската агенда. Околу 30 проценти од инвестицијата се грант‑средства, додека за останатите 70 проценти се разгледува поволно финансирање со меѓународни партнери. Проектот веќе е предмет на физибилити студија; во следната фаза ќе се утврдат локацијата, елаборатот за животна средина, техничкото решение и моделот на реализација.

„Денес за секоја од овие локации одделно плаќаме електрична енергија, системи за ладење, непрекинато напојување, мрежна и серверска опрема, физичка и сајбер‑безбедност и одржување. Со консолидацијата добиваме економија на обем, подобра искористеност на опремата и многу повисок и унифициран стандард на безбедност“, истакна министерот. Тој уште нагласи: „Важно е да ги ставиме размерите во вистински контекст. Не градиме комерцијален hyperscale дата‑центар од 100 или 150 мегавати. Зборуваме за центар со помалку од 1 мегават инсталирана моќност, кој ќе служи за потребите на државата и граѓаните“, рече Андоновски.

Фото: прес-материјал од настанот