Чадот над Скопје доаѓа од пожар на Жеден, вели директорот на ДЗС

Чадот што попладнево е видлив во делови од Скопје доаѓа од пожарот на планината Жеден, во атарот на селото Бојане, соопшти директорот на Дирекцијата за заштита и спасување (ДЗС), Стојанче Ангелов.

Претходно Центарот за управување со кризи (ЦУК) посочи дека зачаденоста во главниот град се должи на силниот ветер што го носи чадот од актуелен пожар на планината Китка, на подрачјето на општините Студеничани и Зелениково.

Два пожара, различни жаришта

Ангелов појасни дека пожарот на Жеден досега се ширел од тетовската страна, а сега се префрла кон скопската страна. Огнот гори на тешко пристапен и стрмен терен, што значително го отежнува гасењето.

„Во интервенцијата, покрај скопските пожарникари, се вклучиле и нивни колеги од Тетово, како поддршка во справувањето со огнената стихија“, рече Ангелов.

Директорот на ДЗС очекува во попладневните часови да биде воспоставена контрола врз пожарот. Тој додаде: „Пожарникарите даваат сè од себе, но се исцрпени, бидејќи со денови немаат одморено оти имаме по повеќе пожари и на територијата на Градот Скопје, но и на Општина Тетово“.

Од ЦУК повторуваат дека зачаденоста во Скопје потекнува од пожарот на Китка, а на таа локација за гасење досега дејствувал и хеликоптер од Министерството за внатрешни работи.

Фото: прес-материјал од настанот