Дупката во ПИОМ достигна 1 милијарда евра; опозицијата алармира, власта тврди дека фондот е стабилен

Дупката во Пензискиот и инвалидскиот фонд (ПИОМ) достигна 1 милијарда евра, што отвори жестока полемика меѓу власта и опозицијата за тоа дали исплатата на пензиите е загрозена и дали фондот е одржлив.

Опозиционата СДСМ предупредува дека ваквиот дефицит го става под ризик навремено исплаќање на пензиите и ја обвинува владејачката партија за политиката која, според нив, ја довела состојбата до неодржливост.

„Состојбата е алармантна, дупката во Фондот Мицкоски ја зголеми на 1 милијарда евра. Тоа се огромни пари, над 14% од целиот буџет. Во ризик е исплатата на пензиите. ПИОМ веќе не може да се полни од придонеси, криминалната банда го доведе до неодржливост. ВМРО-ОКГ и Мицкоски имаат план само како да украдат пари од граѓаните, сè друго растураат“, изјави Јована Тренчевска од СДСМ.

Владата: не создавајте паника, фондот е стабилен

Владејачката ВМРО‑ДПМНЕ возврати дека префрлувањата од државниот буџет кон пензиските фондови се вообичаена пракса во Европа и оти нападите на опозицијата се неосновани, посочувајќи ги и последните покачувања на пензиите како показател дека системот функционира.

„Во однос на хистеријата и паниката која ја создаваат СДС и Тренчевска дека примањето на пензиите е ставено под знак прашалник, имаме лоша вест за нив, а добра за граѓаните, апсолутно пензискиот фонд е стабилен, а на СДС и Тренчевска им е криво што денес пензионерите добиваат 7000 денари покачување, додека во нивно време истото беше 180 денари. Дополнително, пензиите ќе бидат легнати на сметките на пензионерите секој први во месецот“, одговори ВМРО‑ДПМНЕ.

И покрај политичките тврдења, економистите потсетуваат дека дефицитот во пензискиот фонд е долгорочен проблем: придонесите не ги покриваат обврските и секоја година повеќе од една третина од парите за пензии доаѓа од државниот буџет. Лани од буџетот беа префрлени скоро 900 милиони евра, а годинава се планирани 1 милијарда евра за пополнување на дупката.

Во земјата има околу 572 илјади вработени и над 350 илјади пензионери — односно приближно еден пензионер на 1,63 вработени. Дупката беше околу 43% во 2016 и 2017, опадна на 33% во 2023, но повторно се зголеми над 41% поради последните зголемувања на пензиите (две зголемувања по 2.500 денари и две по 1.000 денари), што во вкупност значи покачување од 7.000 денари во помалку од две години.

Фото: прес-материјал од настанот