Филипче: ПЕТ‑центарот итно да се стави во функција, директно се загрозуваат животи

Лидерот на Социјалдемократскиот сојуз на Македонија, Филипче, побара веднаш да се стави во функција единствениот ПЕТ‑центар во јавниот здравствен систем, предупредувајќи дека неговото неработење директно го загрозува здравјето и животите на најтешко болните пациенти со рак.

„Само еден ден работеше ПЕТ-центарот и сега повторно е надвор од функција“, рече Филипче на денешната прес‑конференција и додаде дека станува збор за исклучително важна здравствена услуга за онколошките пациенти, од која директно зависи одредувањето на терапијата и понатамошниот тек на нивното лекување.

Тој нагласи дека околу 15 пациенти дневно се меѓу најтешко болните и дека резултатите од ПЕТ‑скенирањето одлучуваат дали терапијата ќе продолжи или ќе се модифицира, во зависност од стадиумот на болеста.

„Се работи за околу 15 пациенти на ден коишто се најтешко болните пациенти, коишто имаат рак, на коишто животот им зависи од тоа снимање, затоа што тоа снимање ја одредува терапијата или модификацијата на терапијата во зависност од стадиумот во којшто се наоѓа болеста“, истакна Филипче.

Одговор од Министерството за здравство

Од Министерството за здравство минатата недела информираа дека ПЕТ‑скенот во јавното здравство повторно е ставен во функција откако не работеше повеќе од еден месец поради проблем со циклотронот, системот за производство на радиоизотопи. Министерот Сашо Клековски објасни дека дефектот е последица на неисправно одржување од страна на добавувачот и специфичен проблем со масло, и дека потребниот материјал е обезбеден од Истанбул.

Клековски додаде дека се водат разговори и со Софија за дополнителна набавка на радиоизотопи за да може да се вршат снимања и во сабота, а во соопштението беше наведено дека со материјалот донесен од Истанбул ќе се снимаат до девет пациенти дневно.

Филипче оцени дека ПЕТ‑центарот веќе два и пол месеци не функционира и повика на итно решавање на проблемот: „Сега се во ризик. Два и пол месеци не работи досега. Итно да се среди овој проблем. Како знаат и умеат, уште утре да биде ПЕТ-центарот во функција. Директно се загрозува здравјето и животот на најтешко болните пациенти во државава“.

Фото: Архива