Филипче побара оставка од Трајко Славески и истрага од Обвинителството за влезот на Алта банка

Лидерот на СДСМ, Венко Филипче, побара оставка од гувернерот на Народната банка Трајко Славески и повика Основното јавно обвинителство да поведе кривична истрага за начинот на влез на Алта банка во земјата.

Повод за повикот е одлуката на Народната банка на Србија да ѝ ја одземе лиценцата на српската Алта банка, во чија сопственост е и Алта банка Битола (поранешна Стопанска банка Битола). И српската и македонската банка порано беа поврзувани во јавната дебата со наводи за корупција и политичко влијание, а повлекувањето на лиценцата предизвика политички реакции во двете држави.

Барање за брза реакција и одговорност

СДСМ бара итна реакција, додека ВМРО‑ДПМНЕ одговара дека банкарскиот систем е стабилен. Филипче потсети дека антикорупцискиот тим на партијата уште во декември лани прашал зошто е дозволен влезот на Алта банка во Македонија и рече дека клучното прашање е дали премиерот Христијан Мицкоски и гувернерот Трајко Славески добро процениле ризик или, како што нагласи, многу добро знаеле за каква банка станува и биле дел од мрежа мафијашка во Србија.

Филипче предупреди и на масовни обиви пред експозитурите на Алта банка и побара јасност од централната банка. Тој рече:

„Се поставува прашањето дали се загрозени депозитите на нашите граѓани. Се поставува прашањето дали се загрозени депозитите на јавните претпријатија. се поставува прашањето дали сега некој во Народна банка или во Владата ќе направи нешто да го спречи ова стампедо коешто веќе се случува пред експозитурите на Алта банка во неколку градови во нашата земја. Нормално е дека луѓето се исплашени. Апелираме гувернерот јасно и гласно да излезе и да каже дали има простор за грижа на граѓаните. А гувернерот исто така треба да се соочи не само со својата морална одговорност и да си поднесе оставка, туку да се соочи и со кривична одговорност за што го повикуваме Основното јавно обвинителство да поведе истрага. Дали тој добро знаел на каква банка и овозможува влез во земјата“,

Филипче сврза дел од случувањата со предупредувањата што СДСМ ги упатуваше речиси една година за влијанието на т.н. „српски свет“, наведувајќи и пораки од европските институции и од претседателката на Европската комисија, Фон дер Лајен.

„Ова што се случува во Србија е нешто на што ние укажуваме веќе скоро една година наназад. Ова што се случува во Србија како и влијанието тука кај нас во Македонија е нешто на што укажуваат и европските институции и претседателката на Комисијата Фон дер Лајен, дека тука има влијание на српскиот свет“, рече Филипче.

Тој додаде дека партијата со месеци предупредувала за сомнително работење на Алта банка и повика на индиции за врска со криминално стекнати пари. „И сега тоа на што укажуваме изминатите месеци, Алта банка, којашто и според извори на медиуми и наши политички комуникации во Србија беше банка поврзана со криминално стекнати пари од криминал, од корупција, украдени пари од граѓаните, пари кои што потекнуваат од трансфер и шверц на дрога. И вчера таа банка, откако само неколку часа претходно Народната банка на Србија кажа дека сè е во ред, вечерта после полноќ ѝ ја одзеде лиценцата за работа“, рече тој.

Филипче истакна дека поимот „српски свет“ не смее да се меша со српскиот народ, туку го опишува, според него, поврзувањето на политички и криминални структури со власта на ВМРО‑ДПМНЕ и премиерот. Тој говореше и за медиумско влијание и за конзулот Адамовиќ, за кого рече дека е поврзан со мафијата во Србија и за кого премиерот не одговорил во Собранието.

Во меѓувреме, пред експозитурите во Битола и други градови имаше снимки и пријави за граѓани што чекаат да повлечат пари, што дополнително ја зголеми политичката тензија околу случајот.

Фото: прес-материјал од настанот