Filipçe: Nën radar punojnë për propozimin francez — dhe kush shkon në ekskursion në Bruksel në mes të verës?

Kryetari i LSDM-së, Venko Filipçe, vlerësoi se qeveria zhvillon bisedime për rrugën evropiane të shtetit larg syve të publikut dhe se kjo është konfirmim i zbulimit të plotë të politikave me të cilat ajo erdhi në pushtet.

"Ka tashmë një paralajmërim, ka tashmë një deklaratë të ministrit të Punëve të Jashtme se diçka po punohet në lidhje me rrugën evropiane nën radar", thotë Filipçe, duke theksuar se qytetarët mësojnë për hapa kyçe nga deklaratat dhe jo nga një qëndrim i hapur dhe i argumentuar i qeverisë.

Sipas tij, premtimet e periudhës parazgjedhore po rrëzohen njëri pas tjetrit. "Së pari, është e qartë se nuk do ta kthejnë emrin, si premtoi presidentja Siljanovska Davkova", thotë kryetari i LSDM-së.

Foto: LSDM / regjistrim video i deklaratës

E njëjta, shtoi ai, vlen edhe për premtimin më të zhurmshëm, atë për Marrëveshjen e Prespës. "Është e qartë se nuk do ta anulojnë Marrëveshjen e Prespës; përkundrazi, kryeministri Hristijan Mickoski deklaroi se ajo është kryevepër e diplomacisë evropiane", thotë Filipçe, duke përkujtuar retorikën e të njëjtëve njerëz kur kërkonin vota.

Vlerësimi më i drejtpërdrejtë kishte të bëjë me propozimin francez, dokumentin rreth të cilit u zhvillua beteja politike më e mprehtë e vitetve të kaluara. "Ja, tani nën radar është e qartë se po punohet për pranimin e propozimit francez", deklaroi Filipçe.

Si konfirmim ai theksoi udhëtimin e paralajmëruar të kryeministrit në Bruksel, për të cilin përdori ironi që thotë më shumë se një analizë e gjatë. "I quajturi ekskursion i paralajmëruar i kryeministrit në Bruksel është vetëm një konfirmim tjetër për këtë. Kush shkon në ekskursion në Bruksel në mes të verës?", pyeti ai.

Nga të gjitha këto, sipas Filipçes, del një përfundim që e kthen debatin katër vjet prapa. "Kjo është vetëm dëshmi dhe konfirmim se çdo gjë që thoshin është gënjeshtër, se është shpifje dhe se nuk është e vërtetë që LSDM kishte politika tradhtare", thotë kryetari i LSDM-së, duke vlerësuar se pikërisht bllokada e rrugës evropiane në vitet e fundit është politika që i shkaktoi dëm shtetit.