Филипче пред Мицкоски: Водата е загадена во пола држава, а вие немате одговор

Лидерот на СДСМ Венко Филипче од собраниската говорница упати директно пратеничко прашање до премиерот Христијан Мицкоски, со остра оценка дека „секојдневно сè повеќе на виделина излегува неспособноста, коруптивните практики и лагите со коишто владеете“.

„Не помага ниту силниот ПР. Луѓето едноставно повеќе не веруваат, маските се паднати и ова веќе не можете да го сокриете“, порача Филипче пред пратениците и министрите.

Централниот дел од обраќањето беше посветен на кризата со водата. „Водата е загадена во пола држава — во Гостивар, во Валандово, во Скопје во повеќе општини, а немате одговор на многу прашања. Чија е одговорноста? Кој правел контрола? Зошто не се пријавувале соодветно резултатите?“, праша тој.

Како особено алармантен пример, Филипче го посочи наодот од болницата во Лешок: „Водата беше загадена во болницата во Лешок. Внимавајте — резултат од примерок земен од чешма во болница каде што се лекуваат пациенти. Нема одговор какви се резултатите сега.“

Лидерот на СДСМ обвини дека владата ги крие резултатите од анализите на водата во Гостивар и дека граѓаните добиваат контрадикторни пораки од врвот на власта. „Зошто имате контрадикторни изјави — вие едно, министерот за здравство друго? Дека наводно ќе била добра за пиење, а потоа ќе била само технички исправна. Луѓето се збунети, не знаат што да прават и не знаат кому да веруваат“, рече Филипче.

Прашањето до Мицкоски остана суштинско: кој ќе понесе одговорност за тоа што граѓаните со недели немаат сигурна вода за пиење, а институциите молчат.

Фото: СДСМ / видео запис од Собранието