Исцрпени мршојадци ги запоседнаа плажите и патиштата на Крит

На грчкиот остров Крит, изнемоштени и пред сè млади мршојадци се сè почесто наоѓани во населени места — на плажи и лежалки, на хауби на автомобили, на автопат, па дури и на крило на паркиран авион на аеродром — што предизвикува лавина видеа и објави на социјалните мрежи и зголемен број спасувања, велат работници за заштита на животни.

Мариа Ганоти, претседателка на невладината организација за заштита и грижа на диви животни АНИМА со седиште во Атина, објаснува дека ваквите наоѓања се вообичаени во летата со долг период на суша и високи температури, а животните кои имаат потреба од нега се пренесуваат до центарот на организацијата во Атина.

Ганоти вели дека од крајот на јули згрижиле 30 мршојадци, а само вчера кај нив пристигнале пет, што според неа е значителен број. „Мршојадците на Крит се во многу добра состојба со стабилна популација, па затоа има доста млади. Проблемот е што младите мршојадци се неискусни. Многупати се неискусни и во летањето, ги зафаќаат воздушни струења, па завршуваат во морето, од каде што луѓето ги извлекуваат. Или, пак, не успеваат да ги најдат изворите на вода и храна што возрасните ги знаат, па дехидрираат и се исцрпуваат и затоа ги наоѓаат на пример на улици, неподвижни, а автомобилите застануваат и луѓето се прашуваат: „Што е ова?“. Она што им е потребно на овие млади мршојадци, пред сè, е да им се стави сад со вода. Тоа е најважно,“ објаснува претседателката на АНИМА.

Таа додава дека граѓаните треба да ја известат шумската служба на општината или Природонаучниот музеј, кои потоа ги преземаат животните и ги пренесуваат во центри за згрижување. „Ние, повеќето од оние што ќе стигнат кај нас, ги ставаме на интензивна терапија со течности, односно веднаш им даваме инфузија, понекогаш неколку дена, додека не закрепнат. Потоа, по шест до осум месеци ги враќаме на Крит,“ додава Ганоти.

Социјалните мрежи во Грција се преплавени со видеа и фотографии со натписи како „Мршојадец на лежалка на плажа“, „Возиш и мршојадец ти застанува на хаубата од автомобилот и се вози со тебе“ и „Неочекуван гостин на плажа“. Еден од позначајните случаи беше кога мршојадец слетал на задното крило на паркиран авион на пистата на аеродромот во Ираклио; пожарникарот Антонис Петракис објави фотографии по интервенцијата.

Во друг случај, возачот Танасис Гунарис наишол на мршојадец на најпрометниот автопат близу Ретимно, запрел заедно со други возачи и го тргнале животното на сигурно место. „Едно прекрасно диво суштество, очигледно исцрпено, додека околу него автомобилите поминуваа со голема брзина. Веднаш застанав. Заедно со другите луѓе кои се најдоа на местото, накратко го прекинавме сообраќајот и со голема претпазливост, успеавме да го тргнеме од коловозот пред да се случи најлошото. Имав само малку вода и малку храна за мачки. Му ставив вода и му дадов малку храна, главно за да остане на безбедното место и повторно да не излезе на патот. И останавме таму со него, обидувајќи се да го заштитиме од автомобилите што поминуваа,“ напиша Гунарис на Фејсбук и додаде дека веднаш стапил во контакт со АНИМА по што шумската служба од Ретимно го презела животното.

Ганоти предупредува дека не треба да се обидува со раце да се фаќаат птиците поради остриот клунот и дека тоа треба да го направат обучени лица. Таа повторува дека појавата е поврзана со повторувачки суши и горештини и дека секое такво лето ја зголемува учесталоста на ваквите средби.

Фото: прес-материјал од настанот