ЛДП: 15 000 граѓани ја потпишаа петицијата за електронски нараквици

Либерално-демократската партија (ЛДП) соопшти дека 15 000 граѓани ја потпишале нејзината петиција за итно воведување електронска нараквица за сторителите на семејно насилство и оти револтот кај народот поради институционалната немоќ продолжува да расте.

Пратениците да го почнат постапката по скратена постапка, бара ЛДП

Партиското соопштение ја опиша петицијата како општествен фронт што секојдневно се шири и побара од Собранието да го усвои предлогот по итна скратена постапка. „Ова веќе не е само иницијатива, ова е општествен фронт што секојдневно расте и кој јасно им порачува на властодршците – продолжуваме да се потпишуваме за да знаат дека нѐ има многу“, наведува ЛДП.

Од партијата истакнуваат дека е срамно што парламентарното мнозинство се уште молчи пред барањето на 15 000 граѓани и дека се крие зад процедури додека жените во земјата живеат во страв. „Секој нов потпис нè носи чекор поблиску до побезбедна земја во која насилниците ќе носат електронска нараквица, а жртвите ќе ја имаат заштитата што државата е должна да им ја обезбеди“, додаваат од ЛДП.

Партијата порача дека нема да запре додека предложеното законско решение не биде изгласано во Собранието по итна и скратена постапка и ги повика сите граѓани што сè уште не потпишале да се приклучат на петицијата. „Секој глас е глас против насилството, а народниот притисок е премногу силен за да продолжите да го игнорирате“, стои во соопштението.

Актуализацијата на иницијативата следува по фемицидот во Богданци, каде 17-годишната Билјана Кириќ — која претходно пријавувала насилство и закани по животот — беше убиена од својот партнер. По случајот, изминатиот викенд се одржаа протести на кои се бараше одговорност за институционалните пропусти и беа споменати имињата на други жени и девојки кои ги загубија животите: Рамајана, Росица, Танкица, Ивана, Катја.

Во март годинава, мнозинството во Собранието не го поддржа сличниот предлог за дополнување на Законот за спречување и заштита од насилство врз жените и семејството, кој го поднесоа повеќемина пратеници од опозицијата, а пред пратениците го образложи претседателката на ЛДП, Моника Зајкова. ЛДП нагласува дека станува збор за дополнување на постојниот закон и дека дополнувањата не носат финансиска импликација, бидејќи за нивната имплементација може да се искористат електронските нараквици од депото на Министерството за правда предвидени за системот за пробација.

Фото: прес-материјал од настанот