Матичните ќе даваат најмногу пет дена боледување, Фондот најави построги контроли

Директорот на Фондот за здравствено осигурување, Златко Перински, најави сет мерки за измена на правилата за боледување и заострени контроли во исплатите, меѓу кои е и предлог да се ограничи бројот на денови што матичниот лекар може да го издаде одеднаш.

Перински рече дека до Управниот одбор ќе биде предложена измена со која матичниот лекар ќе може да издаде најмногу пет дена боледување наместо досегашните седум.

Проверки, упати и поедноставени процедури

Тој го образложи предлогот како мерка која треба да ја направи системот поправеден и да ги намали потенцијалните злоупотреби, додека средствата стигнуваат до оние на кои им се најпотребни. „Не сакаме да направиме систем кој е построг, туку сакаме да направиме систем што е правичен“, рече Перински.

Перински дополнително наведе дека: „Сметаме дека и пет дена во иднина ќе бидат доволни за дообезбедување дополнителна анамнеза или за продолжување на боледувањето. Се олеснува постапката за издавање боледување за оние лица што не се во можност да дојдат со физичко присуство да го обезбедат боледувањето.“ Контролите ќе се вршат по пријава од работодавач или по случаен избор, во соработка со УЈП и МВР.

Според Перински, контролите откриле неправилности кај речиси 30 отсто од испитаниот примерок на боледувања во МВР; во тој сектор веќе се изречени глоби, а во Министерството за одбрана се финализира анализа. Доколку осигуреникот не биде пронајден дома, тој ќе биде упатен пред лекарска комисија за образложение.

Минатиот месец Фондот исплатил над 623 милиони денари за боледувања, од кои 414 милиони денари се издвоени за породилни отсуства, а преостанатиот дел за други боледувања. „Мораме да бидеме одговорни кон системот со кој управуваме. Кога ќе кажеме бројка од 623 милиони денари исплатени само по основ на боледување, јасно е дека мора да имаме јасно воспоставени правила и механизми во делот на контролата“, истакна Перински.

Перински потсети дека Фондот за 2026 година во рамките на буџетот има предвидено 6 милијарди 454 милиони денари за боледувања и породилни отсуства, што според него е еден од причините за зголемување на контролите.

Во врска со биолошки потпомогнатото оплодување, тој посочи дека мерката за дозвола до шест ин‑витро обиди дава резултати: од над 1 880 обиди, 237 се однесуваат на четврти, петти или шести обид. „Во моментот анализираме градација на финансискиот пакет што го даваме за еден обид. Медицински тимови работат на утврдување поиндивидуализиран пристап во делот на издавање на ваучерот за биолошки потпомогнато оплодување во делот на првиот, вториот или третиот обид, сè со цел да го зголемиме процентот на можност во првите обиди да имаме позитивен исход од целата процедура. Ова се планови што планираме да ги ефектуираме од 2027 година, но за да бидеме сигурни дека ќе имаме и финансиска конструкција, а секако и медицински да имаме поддршка за ова, сепак ќе ни треба уште извесен период да го доработиме“, истакна Перински.

Како дополнителна олеснувачка мерка за пациентите, Фондот ќе предложи да се продолжи рокот за рецепти издадени од дежурните служби—наместо да важат само до полноќ истиот ден, да важат 24 часа.

Фото: прес-материјал од настанот