Мицкоски го обвини Наумов за опструкција на еврообврзницата во 2016 г., тој врати дека повторно би постапил исто

Премиерот Христијан Мицкоски денеска обвини дека поранешниот дополнителен заменик‑министер за финансии Кире Наумов во 2016 година ја опструирал емисијата на еврообврзница, со што, како што рече, државата претрпела дополнителни трошоци во вредност од „неколку милиони евра“ поради зголемените каматни стапки.

Наумов го брани својот потег како „патриотска обврска“

Наумов ги отфрли обвинувањата преку објава на Фејсбук и порача дека е горд на одлуките што ги донел пред десетина години и дека повторно би постапил на ист начин доколку се најде во иста положба. Тој посочи дека како дополнителен заменик‑министер успеал да ги преполови двете еврообврзници во вредност од 400 милиони евра.

Во објавата Наумов напиша: "Да, Кире Наумов беше, без да му се чини. И да, јас сум горд што пред десетина години како дополнителен заменик-министер успеав да ги преполовам двете еврообврзници за 400 милиони евра народни пари, кои ќе требаше да одат за чоколади кога се немаше за леб, за срамна предизборна корупција и за криминални тендери за режимот кој актуелниов премиер самиот денес вели дека бил криминален".

Тој додаде дека спречувањето на задолжувањето било „мòја патриотска обврска“, нагласувајќи дека не станувало збор за паушални писма до инвеститорите, туку за докази дека средствата ќе биле наменети за одржување на „криминален и недемократски режим“, а не за плати или пензии кои, според него, се исплаќале непречено и без тие 400 милиони евра.

Наумов ги повика сегашните владини претставници да ги убедат инвеститорите во добрите економски показатели и да обезбедат пониска каматна стапка за претстојната еврообврзница, посочувајќи дека има најави дека таа може да биде една од повисоките во последниот период. На крајот од објавата тој рече: "И, секако, ако бидам пак во иста позиција, без никаква резерва ќе постапам исто".

Мицкоски, образложувајќи ја причината за вклучување на банкарскиот сектор во измените на Кривичниот законик што Владата ги испрати на разгледување во Европската комисија, го поврза остриот одговор на опозицијата по случајот со Алта банка со настаните од 2016 година. Според него, во 2016–2017, кога постоеше техничка влада, тогашниот заменски заменик‑министер во Министерството за финансии испраќал писма до странски инвеститори што ја опструирале емисијата и ги натерале доверителите да бараат повисоки камати.

Во долгото образложение премиерот рече: "Ако се вратите наназад, да речеме во 2016, 2017 година, кога имавме техничка влада, тогаш заменскиот заменик-министер во Министерството за финансии испраќаше писма во светот на начин на којшто ја опструираше тогашната емисија на еврообврзница, и тоа граѓаните ги чинеше неколку милиони евра повеќе. Зошто? Затоа што тогаш доверителите коишто практично инвестираат во нашата обврзница ги поткренаа каматите, затоа што тие не се алтруисти, тие гледаат профит, не ги интересира зошто ние имаме дома внатрешни ликови како тој што беше тогаш, Кире Наумов мислам дека му беше името, којшто одлучил да си ја кодоши сопствената држава и сопствената влада во светот и на тој начин во суштина да нанесе штета на даночните обврзници, а тоа се во крајна смисла граѓаните. Тоа го прави денеска и оваа гарнитура кај опозицискиот СДСМ и мислам дека е ова една добра форма за понатаму да не се случува и да не се повторува на никој политичар ваква тема да злоупотребува за политички цели".

Мицкоски додаде дека новиот Кривичен законик нема да важи ретроактивно и дека измените ќе се однесуваат само на идни случаи.

Фото: прес-материјал од настанот