МВР вчера санкционирало 167 возачи на електрични тротинети

Министерството за внатрешни работи (МВР) вчера санкционирало вкупно 167 возачи на електрични тротинети при акциска контрола што била спроведена на територијата на целата држава во периодот од 17 до 22 часот, соопшти Министерството. Секторот за сообраќајни работи при МВР ги регистрирал констатираните прекршоци.

Најчести прекршоци – неносење рефлектирачки елек и кацига

Од Министерството посочуваат дека најголем дел од 167-те прекршоци се однесуваат на неносење рефлектирачки елек при управување со електричен тротинет во ноќни услови и неносење заштитна кацига.

„Од страна на Мобилната единица за безбедност на сообраќајот на патиштата констатирани се 81 прекршоци, на подрачјето на СВР Охрид 26, а на подрачјето на СВР Битола 23 прекршоци, додека останатите прекршоци се констатирани на подрачјата на другите сектори за внатрешни работи“, се наведува во соопштението од МВР.

Во рамки на контролата одземени биле два електрични тротинети, а за сите констатирани прекршоци биле преземени соодветни мерки и изречени санкции согласно законските прописи.

Полициските екипи при контролата исто така констатирале 206 прекршоци од друг вид. Министерството најави дека ќе продолжи со засилени сообраќајни контроли со цел зголемување на безбедноста на сите учесници во сообраќајот.

Во соопштението е наведено и дека полицијата за четири месеци евидентирала над 10 400 прекршоци кај возачи на тротинети, мопеди и мотоцикли.

Фото: МВР