Tetovë: "Rrahja e fëmijëve nuk mund të reduktohet në 'konflikt tifozësh'" – reagon prind pas takimit të Kasamit

Prindërit në Tetovë kërkojnë masa më të forta pas një serie incidentesh ku fëmijët e tyre u sulmuan fizikisht dhe u ngacmuan verbalisht nga grupime të dhunshme të mitur, të moshës rreth 13–14 vjeç. Sipas prindërve, sulmuesit i kanë kapur fëmijët za grykë, ua kanë zhveshur xhaketat për të kontrolluar nëse kanë bluzat me shenja të tifozëve të FC Teteks dhe grupit “Vojvodi”, dhe të gjitha rastet i kanë xhiruar dhe publikuar në TikTok.

Kryetari i komunës së Tetovës, Bilal Kasami, mbajti një takim me drejtuesit komunalë dhe përfaqësues të Drejtorisë së Policisë – Tetovë, Këshillit për Parandalimin e Delinkvencës së Mitur, Qendrës për Punë Sociale – Tetovë dhe drejtorëve të të gjitha shkollave fillore dhe të mesme në komunë. Në atë takim nuk u ftuan as prindërit e fëmijëve të maltretuar, as gazetarët.

Në përfundim të takimit u konstatuan se në incidentet ishin të përfshirë tifozë të mitur të dy klubeve lokale të futbollit. Pjesëmarrësit vlerësuan se situata e sigurisë në qytet është e qëndrueshme dhe se nuk kemi të bëjmë me tensione ndër-etnike, por me konflikte të izoluara ndërmjet tifozëve, të ngjashme me raste në qytete të tjera të vendit.

Reagimi i një prindi të prekur

Një nga prindërit, Darko Gavroski, i cili thotë se fëmija i tij u sulmua, reagoi kundër përpjekjes për ta minimizuar dhunën. Ai theksoi se: "Rrahja e fëmijëve nuk mund të reduktohet në 'konflikt tifozësh'" dhe kërkon që autoritetet t'i trajtojnë rastet si vepra penale me element dhune kundër të miturve, jo thjesht si rivalitet sportiv.

Prindërit në Tetovë presin hapa konkretë nga komuna dhe policia për të ndaluar sulmet dhe për të parandaluar shpërndarjen e videove që poshtërojnë viktimat. Ndërsa zyrtarët e përshkruajnë situatën si përplasje lokale të tifozëve, familjet e prekura thonë se fëmijët u përballën me ngacmime dhe turp publik në mënyrë të përsëritur.

Foto: Fejsbuk)