Nikoloski: Linjë e re ajrore Shkup–Podgoricë dhe lidhje me Portin e Barit

Zëvendëskryeministri dhe ministër i Transportit Aleksandar Nikoloski zhvilloi vizitë pune në Podgoricë, ku u takua me kryeministrin Milojko Spajic, zëvendëskryeministrin për çështje evropiane dhe të jashtme Filip Ivanovic dhe me ministrin e Transportit Rados Zecevic. Bisedat ishin të fokusuara në lidhjet transportuese, financimin e infrastrukturës dhe thellimin e bashkëpunimit dypalësh.

Rruga ajrore direkte dhe lidhja me portin e Barit

Nikoloski njoftoi se palët ranë dakord për hapjen e një linje të re ajrore ndërmjet Podgoricës dhe Shkupit dhe për përmirësimin e aksesit ndaj Portit të Barit përmes ndërtimit të autostradës Shkup–Blace.

"Ne tashmë kemi filluar ndërtimin e autostradës Shkup–Blace, që do të thotë hapje e Maqedonisë drejt një porti të tretë — kjo është hapje drejt Portit të Barit, përkrah portit të Selanikut, për të cilin kemi lidhje autostradore dhe hekurudhore, dhe përkrah portit të Durrësit, ku aktualisht po ndërtojmë lidhje autostradore dhe hekurudhore. Po ashtu, me ndërtimin e autostradës nga Shkupi drejt Blaces flasim edhe për lidhje me Portin e Barit," tha Nikoloski.

Ai shtoi se po përparojnë edhe përgatitjet për lidhje ajrore midis dy kryeqyteteve. "Pres që shumë shpejt të nënshkruhet një marrëveshje që do të nënkuptojë një fluturim të drejtpërdrejtë midis Shkupit dhe Podgoricës, me çka do të kemi edhe një kryeqytet tjetër me të cilin jemi të lidhur. Kjo shumë do të ndihmojë zhvillimin e turizmit, por edhe zhvillimin e biznesit dhe lidhjen midis dy vendeve. Aeroportet në Shkup dhe Podgoricë po rriten dhe kjo është një mënyrë e mirë për të vazhduar bashkëpunimin dhe për të vazhduar rritjen e të dy aeroportet," theksoi ai.

Gjatë takimeve u diskutuan gjithashtu aplikime të përbashkëta për fondet dhe bankat evropiane për financim, veçanërisht për sistemet inteligjente të transportit dhe lidhjen e korridoreve, si dhe bashkëpunimi në fushën politike dhe ekonomike.

"Gjithsej, një takim frytdhënës nga i cili kthehemi në shtëpi me një linjë të re ajrore, dhe me lajmin e mirë se autostrada që po ndërtojmë Shkup–Blace do të nënkuptojë lidhje edhe me Portin e Barit," përfundoi Nikoloski.

Foto: material shtypi nga ngjarja