Нови цени на горивата од полноќ — Еуросупер БС-95 86 денари/л, еуродизел 94,5 денари/л
РКЕ ги намали малопродажните цени од полноќ; владината мерка за ДДВ и намалени акцизи се применети.
Од ноќеска на полноќ, по одлука на Регулаторната комисија за енергетика (РКЕ), на малопродажните станици ќе важат пониски цени на нафтените деривати.
Колку се намалуваат и кои се новите цени
Еуросупер БС-95 ќе се продава за 86 денари за литар, цената на еуросупер БС-98 ќе биде 88 денари за литар, а дизелот ќе чини 94,5 денари за литар.
Според одлуката, безнините се намалуваат за по 7 денари за литар, додека цената на дизелот е понижена за 5,5 денари за литар. Малопродажната цена на екстра лесното масло за домаќинство се намалува за 6,5 денари и ќе изнесува 103,5 денари за литар.
Цената на мазутот се намалува за 6,261 денари за килограм и од полноќ ќе се продава за 49,312 денари. Со оваа одлука, просечното намалување на малопродажните цени на нафтените деривати изнесува 7,51 отсто.
Во одлуката на РКЕ е применета владината мерка за намалениот износ на ДДВ за нафтениот дериват еуродизел во износ од 10 отсто, како и намалениот износ на акцизата — по 2 денари за литар кај бензините еуросупер БС-95 и еуросупер БС-98 и по 4 денари кај еуродизел. Новите цени важат од полноќ.
Фото: прес-материјал од настанот
