„Пет тони марихуана“ — проверка на сметки и проширување на осомничените

Две неодамнешни постапки на скопското Обвинителство за организиран криминал и корупција откриваат нови детали за шверцот на пет тони марихуана од Македонија во Србија, по повеќе од шестмесечен молк додека траеше истрагата.

Едниот чекор е објавена спогодба со двајца од осомничените, а другиот е најавата дека обвинителството ќе подигне обвиненија против уште седум лица. Вкупно 19 инкриминирани од шверцерската група се пријавени во двете држави.

Што кажува пресудата

Основниот кривичен суд ја прифати спогодбата со обвинетите Драган Стојанов и Александар Ивановски и им изрече казни затвор. Судската одлука и најавата на обвинителството се испреплетуваат, бидејќи во пресудата се наведени иницијалите и улогите на некои од новоосомничените.

Од пресудата со која Стојанов е осуден на три и пол години затвор се дознава дека криминалната група не еднаш, туку петпати пренела марихуана преку северната граница — во август, септември и ноември лани и последен пат на 13 јануари годинава.

Во рамките на истрагата, се проверуваат и сметките на други македонски фирми кои биле во деловни врски со сопствениците или со веќе инкриминираната скопска компанија Алфафарм. Финансиските проверки се дел од проширување на истрагата што може да доведе до дополнителни обвиненија.

Обвинителството најавува дека се очекуваат дополнителни притвори и формални пријави додека трае обработката на новите докази.

Фото: Prizma / Facebook