Пожарот на Жеден го обви Скопје во чад

Од пладне густ чад го обви Скопје: мирисот и оџаците беа почувствувани низ целиот град, што вознемири дел од населението. Надлежните смируваат дека во урбаното подрачје нема активен пожар и нема непосредна опасност за граѓаните, а причината за чадот е ветерот што го носи од пожар на планината Жеден во атарот на селото Бојане.

Китка, Бигла и други жаришта - обвиненија за намерно палење и различни проценки за штетата

Пожарот на планината Китка, кој избувна вчера, повторно е активен; надлежните велат дека постојат индиции за намерно палење затоа што новите огништа се појавиле далеку од линијата на пожарот. Според информациите, линијата на пожарот во моментов надминува 10 километри и се наоѓа во главно непристапен терен.

„Луѓе кои од користољубие или советнички мотиви упорно го палат и повторно подметнаа долга линија која што беше невозможно да се изгаси брзо. Овие злобници, кои што палат ваков пожар на вакво место, треба да знаат дека со нивното поведение ризикуваат да убијат други луѓе, жителите на многубројните села околу и под Китка“, изјави Стојанче Ангелов, директор на Дирекцијата за заштита и спасување (ДЗС).

Пожарот кај делчевското село Бигла е локализиран, но според првичните извештаи штетата е голема: за околу 10 часа биле уништени над 200 хектари борова и дабова шума. Од друга страна, градоначалникот на Општина Делчево даде пониска проценка за пожарот што избувна вчера околу 10:30 часот.

„Пожарот кој избувна вчера околу 10:30 часот во моментот е локализиран и ставен во мирување. Со претходно добро направена опсервација со дрон беа лоцирани сите критични точки по што веднаш се пристапи на терен на локално гасење на самиот пожар. Од тоа што имам како информации се работи за површина на изгорена борова и дабова шума од 22 хектари“, вели Иван Гоцевски, градоначалник на Општина Делчево.

Против старецот кој е осомничен дека го предизвикал овој пожар палејќи гуми во дворот од куќата засега не е поднесена пријава.

ЈП „Македонски шуми“ соопшти дека кракот од пожарот кој од Србија се движеше кон граничниот премин Табановце и планинските села во Општина Липково е локализиран и е под контрола.

„Во текот на вчерашниот ден бевме во постојана комуникација со надлежните во Република Србија. Се работеше интензивно на тој пожар и во текот на вчерашниот ден, до доцна во попладнето, целосно беше ставен под контрола тој крак кој претставуваше опасност да дојде до нашата граница. Има чадење во внатрешноста како и секој пожар, меѓутоа ќе почекаме да видиме дали целосно ќе биде ликвидиран“, изјави Кире Михаилов, заменик директор на ЈП „Македонски шуми“.

Во моментот во државата се активни пет пожари: на планините Китка и Жеден, како и во општините Македонски Брод и Илинден. Под контрола е пожарот кај кичевско Тајмиште каде гори букова шума. Противпожарните единици и планинските тимови работат на повеќе фронтови, а метеоусловите и ветерот и натаму влијаат врз ширењето и држењето на чадот над населените места.

Огнен Чанчаревиќ

Фото: прес-материјал од настанот