Тепачка во албанскиот парламент: Нока му го украде микрофонот на Баља
Седницата беше стопирана на пет минути откако пратеникот Фљамур Нока го истргна микрофонот од пратеникот на СП, Таулјант Баља, во време на антивладините протести.
Во албанскиот парламент денеска избувна физичка пресметка откако пратеникот од опозициската Демократска партија, Фљамур Нока, му го истргна микрофонот на шефот на пратеничката група на владејачката Социјалистичка партија, Таулјант Баља, и почна да фрла хартии кон него.
Пауза и тензија во сала
Претседателот на парламентарното собрание, Нико Пелеси, нареди пауза од пет минути по инцидентот. Настанот се случи додека Баља го презентираше ставот на мнозинството, а пратениците на опозицијата претходно ја блокираа говорницата со фотографии од демонстрантите повредени на протестите.
Инцидентот се случи на десеттиот ден од масовните протести во Албанија, за време на кои демонстрантите бараат оставка од премиерот Еди Рама. Опозицијата тврди дека парламентот не може да работи нормално додека траат протестите и обвинувањата за полициско насилство.
„Денеска има само една точка на дневен ред. Го осудуваме полициското насилство. Мора да бидеме со демонстрантите, да ги слушнеме нивните барања и гласот на генерацијата што не се плаши од владата. Не може да има парламентарна дискусија во услови на социјална криза“, се наведува во заедничкиот став на пратеничката група на Демократската партија, кој го прочита Бељинд Кељиќи.
На дневниот ред беше интерпелацијата за министерот за внатрешни работи, Ервин Дема, која опозицијата ја побара поради постапките на полицијата за време на протестот пред парламентот. Испрашувањето претходно беше одложено со образложение дека Дема штотуку ја презел функцијата и му треба време да ги согледа отворените прашања.
Утрово премиерот Рама повторно ги повика демонстрантите на дијалог, но овојпат остави писмени покани на бетонски клупи наместо столчињата што ги постави претходно — кои демонстрантите ги скршија во претходните денови. Рама предупреди и на можност за построги мерки против учесниците во насилните протести, вклучително и ограничување на одредени услуги и можност за забрана за влез во земјите од Европската унија.
Фото: прес-материјал од настанот
