Топлотниот бран се засилува — цела Македонија во портокалова фаза

Денес целата територија на Македонија е ставена во портокалова предупредувачка фаза поради засилен топлотен бран, при што температурите на воздухот ќе се движат помеѓу 32 и 40 степени, соопшти метеорологот Славчо Попоски.

„Во Скопје и околината максималната температура ќе се искачи до околу 39 степени“, рече Попоски и посочи дека најтопло ќе биде во низинските и централните предели на земјата.

Прогнозата најавува претежно сончево време со појава на мала до умерена локална облачност. Ќе дува слаб до умерен ветер, претежно од јужен и југоисточен правец. Во попладневните часови, во планинските предели ќе има услови за краткотрајна нестабилност проследена со пороен дожд, грмежи и засилен ветер.

Апел до граѓаните

Попоски апелира: „Поради топлотниот бран, апелирам граѓаните доколку немаат потреба да не излегуваат во најтоплиот дел од денот (од 11 до 17 часот) како и да пијат повеќе течности“. Тој посочи и дека треба да се внимава на деца, старите лица и хронично болните поради ризикот од топлотен стрес.

Портокаловата фаза значи многу високи до екстремно високи температури на голем дел од територијата; локалните попладневни невремиња во повисоките предели можат привремено да ги намалат температурите, но да донесат интензивен дожд и силен ветер. Граѓаните и службите треба да ги почитуваат препораките и да ги преземат основните мерки за заштита во наредните денови.

Фото: прес-материјал од настанот