Висок ризик од пожари низ речиси целата земја, освен повисоките делови на Шара

Центарот за управување со кризи (ЦУК) информира дека речиси целата територија на земјата, со исклучок на повисоките делови на Шара, е со висок метеоролошки индекс за опасност од пожари.

„Иако во моментов нема подрачја со многу висок индекс, постои ризик од појава на пожари на отворен простор и шумски пожари со висок интензитет,“ велат од ЦУК.

До 13 часот денеска се регистрирани седум пожари на отворен простор: три се активни, два се под контрола, а два се изгаснати.

Активни пожари има кај селото Лакавица во штипското подрачје, кај местото Видуш во близина на Македонски Брод, како и на воениот полигон Криволак во Неготино, каде што гори ниска вегетација.

Под контрола и изгаснати интервенции

Пожарите се ставени под контрола на депониите кај Крива Паланка и Делчево, додека се изгаснати пожарите на патот пред РЕК Битола во општина Новаци и кај местото Кулата во Велес.

ЦУК ги потсетува граѓаните и институциите на зголемениот ризик и на потребата од претпазливост при работа и престој во природа. Е.М.

Фото: прес-материјал од настанот