Во Германија се очекува недостиг од над 700.000 работни места до 2029

Германија во следните години може да се соочи со значително посилен недостиг на квалификувана работна сила, при што проекциите укажуваат дека до 2029 година ќе недостасуваат повеќе од 700.000 работници поради демографските промени и пензионирањето.

Според проекцијата, до 2029 година на германскиот пазар на труд би можело да недостигаат околу 723.000 квалификувани работници во различни сектори. Тоа е речиси двојно во споредба со минатата година, кога недостигот изнесувал приближно 370.000 лица.

На врвот на листата со најголем недостиг се работните места во продажбата — проценето е дека до 2029 година ќе недостигаат околу 39.100 работници во секторот за продажба. Во грижа за деца потребата од кадар ќе биде голема, со проектирани околу 29.900 непополнети позиции.

Кои сектори ќе бидат најпогодени

Следуваат социјалната работа и социјалната педагогија, каде што би можеле да останат приближно 23.600 слободни места. Во здравствениот сектор и медицинската грижа се очекува недостиг од околу 18.700 работници, додека во електроиндустријата проекциите укажуваат на потреба од околу 17.000 квалификувани лица до 2029 година.

Авторот на студијата, Александар Бурштеде, предупредува дека пензионирањето на голем број вработени ќе биде еден од главните фактори што ќе го зголемува јазот меѓу понудата и побарувачката на германскиот пазар на труд. Приливот на работна сила од странство, според проценките, нема да биде доволен целосно да го надомести излегувањето на работници поради пензионирање.

Недостигот претставува предизвик за компании и јавните услуги, особено во сектори каде што веќе има зголемена потреба — здравство, нега на стари лица, грижа за деца и социјални услуги. Ако сегашните трендови продолжат, обезбедувањето квалификуван кадар и привлекувањето странски работници ќе останат клучни прашања за германската економија.

Фото: Фрипик