Во Шипковица ќе се запали „Факел на слободата“ за поддршка на обвинетите раководители на ОВК

Во Шипковица вечерта на 14 септември 2026 година, со почеток во 19:00 часот, ќе се одржи настан наречен „Факел на слободата“ — јавен израз на единство и поддршка за четворицата поранешни раководители на ОВК кои се пред суд во Хаг.

Организацискиот совет на ветераните на ОВК повика сите Албанци да се приклучат на настанот, кој е закажан два дена пред објавувањето на конечната пресуда на Специјализираниот совет во Хаг за Хашим Тачи, Кадри Весели, Јакуп Красниќи и Реџеп Селими. Пресудата ќе биде изнесена на 16 септември 2026 година.

Во интервју за телевизијата Клан, претседателот на ДУИ, Али Ахмети, предупреди дека евентуално нефер решение може да го промени текот на историските трендови. Тој изјави: „Судиите мора да имаат, и имаат најголема одговорност, бидејќи многу се плашам дека тоа ќе влијае на промена на курсот, бидејќи многу инвестиравме во мирот, стабилноста, безбедноста, и во Косово и во Северна Македонија. Ако Косово е во болка, таа болка ја чувствуваат сите Албанци во Северна Македонија и во Албанија, бидејќи истата рана им е нанесена на Албанците. Затоа, мора да се земе предвид дека на Косово мора да му се гарантира иднината.”

Повик кон сојузниците и потсетување на минатото

Ахмети ги поврза корените на судењето со, како што рече, лажните и „монструозни“ тврдења на поранешниот швајцарски сенатор Дик Марти и нагласи благодарност кон НАТО и западните партнери кои, според него, ѝ помогнале на ослободителната борба на Косово. Тој рече: „Нашата војна беше ослободителна. Ги почитувавме сите меѓународни документи за воите. Се надевам дека обвинителството и судот ќе ја земат предвид важноста на овие историски случувања, бидејќи тука може да следи: денес е казнета, хипотетички зборувам за ОВК, за нејзините водачи, а утре може да се отвори досие за САД, за НАТО, за ЕУ...Бидејќи без помошта на НАТО, без помошта на Америка и сојузниците кои се приклучија на НАТО, секако сами немаше да успееме да го ослободиме Косово. Слободата ја освоивме со крв, но ослободувањето го постигнавме со нашите сојузници, на кои мора да им бидеме благодарни цел живот.“

Обвинителството ја базира својата обвинителна конструкција на искази од околу 270 сведоци и на илјадници страници документи. Хашим Тачи поднесе оставка на функцијата претседател на Косово и доброволно се предаде на судот во ноември 2020 година, откако беше подигнато обвинението. Тој се изјасни како невин за дела што опфаќаат прогон, убиство, мачење, злоставување и исчезнување на луѓе, настанати помеѓу април 1998 и август 1999 година, на повеќе локации во Косово и во северна Албанија.

Меѓурегионалната загриженост е дека евентуална осуда може да биде толкувана не само како поединечна одговорност, туку како општа осуда на ОВК и на легитимитетот на Косово. Аналитичарите предупредуваат дека каков и да е исходот, пресудата веројатно нема да ги подобри односите меѓу Србија и Косово, и дека таква одлука може да биде искористена политички во Србија, особено во изборен период.

Пред два дена во Приштина се одржа „Марш на слободата“ во поддршка на обвинетите, на кој присуствуваше и Али Ахмети; на Фејсбук тој напиша: „Од Приштина денес ја упативме пораката дека правдата и слободата мора да одат заедно. Слава на сите маченици на слободата! Да живее Косово! Слава на ОВК!“ Ахмети, исто така, оцени дека премиерот Албин Курти можеби решил да не присуствува од претпазливост заради можни исвиркувања: „Мислам дека бил внимателен, така мислам, ова е моја проценка. Можеби помислил дека може да има реакции од луѓето што беа присутни на плоштадот, но имаше пратеници од ВВ. Постоеше можност некој да го исвирка.“

Фото: прес-материјал од настанот