За 7 години СДСМ просечната плата порасна за 80,87%, за 2 години ВМРО‑ДПМНЕ за 18,11% — месечниот темп е ~0,72–0,73%

Според податоците на Државниот завод за статистика, просечната месечна исплатена нето-плата во Северна Македонија бележи речиси идентична сложена месечна стапка на раст за два анализирани владини периоди: јуни 2017–мај 2024 (власт предводена од СДСМ) и јули 2024–јуни 2026 (власт предводена од ВМРО‑ДПМНЕ).

Пресметките на геометрискиот просек покажуваат дека месечната стапка на раст во двата периода е приближно 0,72–0,73 проценти.

Во првиот период од 84 месеци, од јуни 2017 до мај 2024, просечната нето-плата се зголеми од 22.808 денари (околу 371 евро) на 41.252 денари (околу 671 евро). Тоа е вкупен пораст од 18.444 денари или 80,87 проценти — со просечен номинален раст од околу 222 денари месечно и сложена месечна стапка од околу 0,72%.

Побрз апсолутен прираст, но слична релативна стапка

Во вториот период, од јули 2024 до јуни 2026 (24 месеци), нето-платата порасна од 40.961 денар (околу 666 евра) на 48.381 денар (околу 787 евра). Ова претставува зголемување од 7.420 денари или 18,11% вкупно. Просечниот номинален месечен прираст изнесува приближно 323 денари, додека релативната (процентуална) месечна стапка останува на околу 0,73%.

Разликата во номиналниот месечен прираст во корист на периодот 2024–2026 главно произлегува од поголемата почетна основа, усогласувањата со инфлацијата и законската минимална плата, а не од значително повисока процента стапка на раст.

Премиерот Христијан Мицкоски, во гостување на ТВ Сител неделава, кажа дека во нивно време просечната плата расте за 70% повеќе. „Просечната плата, ако анализирате 84 месеци влада на СДСМ и ДУИ… Кога велам 84 месеци, зборувам од месец јуни 2017 година, којшто е прв месец на таа влада, заклучно со месец мај 2024 година, којшто е последен месец на таа влада, бидејќи јуни 2024 година ни е попола, наша влада и техничка влада на СДСМ и ДУИ. Затоа завршуваме до месец мај 2024 година. Ако го анализирате порастот на просечната плата во тој период и го споредете со порастот на просечната плата од месец јули 2024 година, којшто е наш прв месец како Влада предводена од ВМРО-ДПМНЕ, а со коалиционите партнери ЗНАМ и ВЛЕН, и последниот податок којшто го има објавено Државниот завод за статистика, а тоа е мај 2026 година, тоа се 23 месеци, ќе дојдете до заклучок дека за 70% повеќе расте просечната плата во овој период на оваа Влада споредено со периодот на претходната влада. Тоа се бројки. Овие бројки вие не можете да ги лажирате“, изјави Мицкоски.

Фото: прес-материјал од настанот