Здружението на судиите: Судството опстанува на работ на своите можности

Здружението на судиите го оцени како загрижувачки извештајот на Судскиот совет за работата на судовите во 2025 година и повика на итни и системски мерки за кадровско зајакнување, соодветно финансирање и дигитализација на судските процеси.

Според Здружението, недостигот на судии, судска администрација и финансиски средства сериозно го отежнува функционирањето на правосудниот систем и на неговата способност навремено да им обезбеди правда на граѓаните.

Клучни приоритети

„Извештајот јасно и недвосмислено ја отсликува алармантната состојба во која е доведена судската власт како трета власт во државата. Податоците за недоволната пополнетост на судиските места, драстичниот недостиг на судска администрација и ограничените буџетски средства не се само статистички показатели, туку сериозно предупредување за функционалноста на правосудниот систем и неговата способност навремено да им обезбеди правда на граѓаните“, се вели во соопштението од Здружението.

Здружението предупреди дека нормативните промени сами по себе нема да ја поправат ситуацијата ако не се следени со ресурси и функционални решенија: „Бројките од извештајот покажуваат дека нормативните промени, доколку не се проследени со соодветни ресурси, кадровско зајакнување и функционални решенија, не само што не гарантираат подобрување, туку не успеваат да го спречат понатамошното влошување на состојбите“.

Меѓу приоритетите што ги наведоа се ревидирање на судската мрежа, дигитализација и примена на вештачка интелигенција во судските процеси, професионализација и кадровско екипирање на судската служба, како и обезбедување предвидливо и соодветно судско буџетирање. „Особено значајно е што во рамките на меѓународната поддршка за владеење на правото веќе се идентификувани конкретни насоки и можности за унапредување на состојбите. Меѓу нив се ревидирањето на судската мрежа врз основа на реалните потреби на граѓаните, примената на вештачката интелигенција и дигитализацијата на судските процеси, професионализацијата и кадровското зајакнување на судската служба, како и обезбедувањето финансиска независност преку соодветно и предвидливо судско буџетирање“, пишува во соопштението.

Здружението нагласи дека судиите и покрај ограничените ресурси продолжуваат да постапуваат по предметите и да работат на намалување на заостатокот, но нагласи: „Затоа, потребни се итни, применливи и мерливи мерки, засновани врз реалните потреби на судовите, позитивните практики во системот и препораките од релевантните меѓународни извештаи. Реформите мора да бидат резултат на стручни анализи, институционален дијалог и долгорочна визија, а не на краткорочни политички цели и декларативни заложби“.

Во соопштението се посочува и дека „Правдата не може да биде ефикасна без судии, без професионална судска служба и без соодветни ресурси. Судството не смее да биде оставено да опстанува на работ на своите можности, додека од него се очекува да ги исполнува сите обврски кон државата и граѓаните“ и дека Здружението е подготвено активно да учествува во процесите за унапредување на судскиот систем.

Камбовски: Недостигот на судии и персонал ја намалува реализацијата и ефикасноста на судовите.

Фото: прес-материјал од настанот